Nachruf Sepp Mooser

Am 20. Februar 2023 ist unser Aktivmitglied Joseph Teophil "Sepp" Mooser im Alter von 87 Jahren im Kantonsspital Winterthur friedlich für immer eingeschlafen.

Sepp Mooser war seit 1989 ununterbrochen Mitglied in unserem Jodelclub und bereicherte mit seiner warmen und kräftigen Stimme den ersten Bass. Er war bei jeder Probe anwesend. Daneben verwaltete er in seiner gewissenhaften und ordentlichen Art die Trachten, das Herzstück unseres Clubs, bis zuletzt. Sepp wurde 2016 an der Delegiertenversammlung des Nordostschweizer Jodlerverbandes in Winterthur zum Veteran geehrt.  In Anerkennung seiner Treue zum Club wurde Sepp 2017 zum Ehrenmitglied des Jodelclub Wülflingen ernannt.

Nachruf:

Dä Sepp isch vor 34 Jahr em Jodelclub Wülflinge biiträtte. I dere Ziit hät de Club 8 Präsidente gha und mängs unruhigi Ziit müese durestah. De Sepp aber isch de ruhigi Pol im Verein gsi, wos genau für das brucht hät. Sit ich de Sepp käne, han ich vo ihm nie nur eis schlächts Wort ghört. Er hät e Rueh usgstrahlt, wo au die hitzige Chöpf hät chöne zur Vernunft bringen und sie as würklich wichtige immene Verein wieder erinneret hät: nämlich Kameradschaft und Singe. Und das sind nöd mini Wort, sondern das hät mir de Sepp vor zwei Jahr persönlich gseit.

Fürs 75-Jahr-Jubiläum von euesem Jodelclub hämmer e Fäschtschrift verfasst und däzue mit jedem Mitglied e chliises Interwiu gmacht. Da mer ja mit em Sepp per E-Mail nöd e so guet hät chöne kommuniziere, han ich ihm dänn aaglüüte und ihn gfröget, was ihm am Jodelclub Wülflinge bsunders gfallt. Er hät dänn mit sinnere humorvolle Art nume gseit, agfange mitemene herzliche «hö», "schriib doch eifach öppis ane“. Er hät sich dänn gliich no für e eigeni Antwort entschiede, und zwar dass er Kameradschaft bi eus sehr schätzt und das er halt eifach gern singt.
Das er gern und guet singt, hät er i vielne Probe und Uuftritt bewiese. Sini weich und tüüf Stimm hät üse Chor immer beriicheret. Und wämmer amigs uf de Bühne gloffe sind für en Uuftritt, hät de Sepp meischtens no schnäll gfröget, was mär dänn jetzt singed. Er hät kei grossi Vorbereitige bruucht und mär hät sich eifach uf de Sepp chöne verlah. Üsi Jodlerin d’Claudia hät sich bi de Lüüt umeglost und einiges über de Sepp zämetreit, wo scho chli länger zrugg lieged.
So hämmer doch no es paar Sache erfahre, womer vom Sepp nonig kännt händ. So zum Bispiel, dass de Sepp gegenüber dä Jodlerinnen chli en ein Charmeur gsi isch. So söll er früher regelmässig Luxenburgerli in die Probe bracht ha, wobi er die annschiinend a de Präsidentin hät müese verbii schmuggle.
Vill hätt mä de Sepp au im einte oder andere Restaurant angetroffen, i de Breiti beim Jasse, i sim Stammrestaurants im Grüntal, im Freieck und natürli im Central, wo er gern e nöd z’kalte Flasche Bier oder einen Kafi Lutz trunke hät. Und so hät de Sepp die Ziit au guet überstande, wo mir än Präsi gha händ, wo s’Bier nöd gnueg chalt hät chöne sii. I dem Fall hämmer am Sepp sini Bierfläsche eifach churz vor em Serviere no is südend heisse Wasser für d’Eigwaare gstellt und de Sepp hät au bim Jodelclub au e für ihn perfäkti trinktemperatur übercho.
Und wämmer mit em Sepp hät welle is Gspröch cho, hät mer ihn nume müese nach sinere Herkunft fröge, em friburgisiche Jaun. So hät mer au nach em Jodelfäscht 2009 in Naters im Wallis uf em heiwäg mit em Car en Halt in Jaun iigleit, und zwar mitte im Dorf bi sinnere Schwöschter. Das hät ihn sehr gfreut und stolz gmacht, hät er eus chöne zeige, wo er uufgwachse isch.
Wiederum bekannt vom Sepp isch, dass er eigentlich nie binnere Prob gfehlt hät. Es hät ihm scho sehr viel müese weh tue, das er dihei blibe isch. So hät mer no i de 90-er Jahr jewils a de Generalversammlige d’Absänze verläse. Und wänn mer imene Jahr weniger als 4 Mal gfehlt hät, so hat mer en Zinnbächer mit dä Prägig vom Jodelclub übercho. Wämmer dänn sächs so Zinnbächer becho hät, hät mer no zwei Jahr nöd dörfe fehle und es hät es Tablo gäh. Und zur Krönig nach wiitere 4 Jahr hets no die passendi Zinn-Chane dezue gäh. Und de Sepp hät das ganze Set i de chürzischt mögliche Ziit vo grad emal 12 Jahr komplett gha.
Au allne bekannt isch sini Hilfsbereitschaft bi üsnä Aaläss, wo er immer tatchräftig mitgholfe hät, ob i de Chuchi bim abwäsche oder Spiise richte, spöter hät mer ihn aau gern mal als Gast bi eus begrüesse dürfe. Und was alli vom Jodelclub vom Sepp känned, isch sis Lieblings-Jodellied. Jedes Mal, womer de Sepp no im Central nach de Prob troffe händ, aber au wo mir am 23. Oktober vom letschte Jahr spontan zwüsched em Chile-Singe und em Altersnamitag no im Altersheim Adlergarte sind go de Sepp bsueche und  i de Tracht - ihm es wunderschöns Ständli händ dörfe singe, händ mir siis Lied dörfe aastimme, und mär hättem jedesmal sini Freud aagseh. Und drum isch es nie e Fraag gsi, weles Lied hüt nöd dörf fähle und mir für Sepp singed: En gschänkte Tag vom Dölf Stähli.